கவிஞர் சுகுமாரன்

"கவிதையெழுத்தில் ஏறத்தாழ இருபத்தைந்து வருடங்களைக் கடந்த பின்னும் இந்த வடிவத்தின் மீதுள்ள ஈர்ப்பு தேய்ந்துவிடாமல் நீடிப்பது ஆச்சரியம் தருகிறது. கூடவே, அனுபவம் கவிதையாவதன் பின்னணிச் சவால்கள் தீவிரமுற்று நெருக்கடிக்குள் திணறச் செய்வதும் தொடர்கிறது. 'இது கவிதை' என்று தீர்மானிக்கவியலாத உள்-அலைச்சல்களும் 'இது கவிதைக்குரிய அனுபவம்' என்று கணிக்க முடியதாத பதற்றமும் தொடர்ந்து கொண்டேயிருக்கின்றன. இந்த அலைச்சலும் பதற்றமும்தான் வேறுவேறு எல்லைகளில் கவிதையைப் பயின்று பார்க்கும் சுதந்திரத்தையும் தருகிறது"
என்று தனது கவிதை அனுபவம் பற்றி கூறும் சுகுமாரன் கோவையில் பிறந்தவர் (11/6/1957).

விற்பனை பிரதிநிதி,மொழி பெயர்ப்பாளர், பத்திரிக்கையாளர், தொலைக்காட்சியின் செய்தி ஆசிரியர் என்று பல்வேறு பணிகளில் செயல்பட்ட சுகுமாரனின் மனதில் எப்போதும் கவிதை நீரோடை ஓடிக்கொண்டிருக்கிறது.

சென்னை பல்கலைக்கழகத்தில் பி.எஸ்.ஸி பட்டம் பெற்ற சுகுமாரனுக்கு கவிதை தவிர சினிமா மீதும் தீராத காதல் உண்டு. அடூர் கோபாலகிருஷ்ணனின் சினிமா பற்றிய புத்தகமொன்றை (சினிமா அனுபவம்) தமிழில் மொழிபெயர்த்திருக்கிறார்.

சுகுமாரனின் புத்தகங்கள்

கவிதைத் தொகுப்புகள்

கோடைக்காலக் குறிப்புகள்(1985)

பயணியின் சங்கீதங்கள் (1991)

சிலைகளின் காலம்(2000)

வாழ்நிலம் (2002)

பூமியை வாசிக்கும் சிறுமி (2007)

மொழிபெயர்ப்புகள்

மார்க்சிய அழகியல் - ஒரு முன்னுரை (விமர்சனம் 1985)

வெட்டவெளி வார்த்தைகள் (கன்னட வசன கவிதைகள் 2000)

இது தான் என் பெயர் (சக்கரியாவின் மலையாள நாவல் 2001)

கவிதையின் திசைகள்(உலகக் கவிதைகள் 2001)

பாப்லோ நெருதா கவிதைகள் (100 கவிதைகளின் மொழிபெயர்ப்பு 2005)

பெண் வழிகள் (மலையாள பெண்நிலைக் கவிதைகள் 2005)

மயிலம்மா - போராட்டமே வாழ்க்கை (ஆதிவாசிப் போராளியின் வாழ்க்கை 2006)

சினிமா அனுபவம் (2006)

காளி நாடகம் (உண்ணி ஆர். இன் சிறுகதைகள் 2007)

மதில்கள் (வைக்கம் முகம்மது பஷீரின் நாவல் 2008)

அரபிக்கடலோரம் (சக்கரியாவின் கட்டுரைகள் 2008)

கட்டுரைகள்

திசைகளும் தடங்களும் (2003)

தனிமையின் வழி ( 2007)

இழந்த பின்னும் இருக்கும் உலகம் (2008)

வெளிச்சம் தனிமையானது (2008)