வாயில்   தொடர்கள் பயணக் கட்டுரை சக்தி ஜோதி

தொடர்கள் வாயில்

தண்ணீரைப் போன்றது இந்த உலகத்து மதங்கள் எல்லாம். தண்ணீர் மென்மையானது, பலமற்றது. ஆனால் இந்த பூமியை அசைக்கக் கூடிய வல்லமை படைத்தது. மிகப்பெரிய பாறைகளையும் துண்டாக்கக் கூடிய சக்தி உடையது. உலகின் எந்த மதமும் பேசுவது அன்பைப் பற்றி தான். சக மனிதரை நேசிக்க வேண்டும் என்பதை மிக வலிமையாக மதங்கள் எடுத்துச் சொல்கின்றன. உலகின் எங்கு வாழும் மனிதர்க்கும் தேவையானது அன்பு மட்டும் தான். மனிதர்களை மட்டுமல்ல இயற்கையையும் நேசிக்க வேண்டும் என்பதையும் மதங்கள் வலியுறுத்துகின்றன.

சீனாவில் தாவோயிசம், கன்ஃபூசியனிசம், புத்திசம், கிறிஸ்தவம், இஸ்லாம் மற்றும் இந்து என பல்வேறு மதங்கள் பின்பற்றப்படுகின்றன. ஆனால் மதங்கள் தோன்றுவதற்கு முன்பு சீனர்கள் இயற்கையை வழிபட்டனர். பின் வந்த நாட்களில் தங்கள் முன்னோர்களை வழிபட்டனர். பின்பு தாவோயிசம் உருவானது. தாவோ என்பது மார்க்கம் (பாதை). இயற்கையோடு இயைந்த வாழ்க்கைக்கான வழிகாட்டி என்று சொல்லலாம்.

பின்பு வந்த கன்ஃபூசியனிசம் மதம் அல்ல என்கிற வாதமும் உண்டு. இயற்கையோடு இணைந்து நல் ஒழுக்கத்துடன் வாழ்வதற்கான வாழ்வியல் தத்துவம். கன்ஃபூசியனிசத்தில் நான்கு தலைமுறை முன்னோர்களை வழிபடும் வழக்கம் உள்ளது. ஆள்பவன், ஆளப்படுபவன், தந்தை, மகன், தாய், மகள், அண்ணன், தம்பி, அக்கா, தங்கை என ஒருவர் மேல், ஒருவர் கீழ் என்கிற பிரிவினையில் மூத்தவர் வழிநடத்த வேண்டும். இளையவர் பின்பற்ற வேண்டும் என்பது நியதி. நண்பர்கள் மட்டுமே சமநிலையில் வைத்துப் பார்க்கப்படுவார்கள். எப்படி ஆளுகை நடத்துவது என்பது பற்றி கன்ஃபூசியனிசத்தில் தெளிவாக சொல்லப்பட்டு இருக்கிறது. மன்னர் ஆட்சியில் சீன ஆட்சிப் பணி தேர்வில் கன்ஃபூசியனிசம் ஒரு பாடமாக பின்பற்றப்பட்டது.

சீனாவில் மதங்கள் என்பது கடவுள் சார்ந்த விஷயம் அல்ல. எனவே முதல் நூற்றாண்டில் இந்தியாவிலிருந்து சென்ற புத்த மதம் சீனாவின் தாவோயிசம், கன்ஃபூசியனிசம் பின்பற்றக் கூடிய நெறிமுறைகளோடு தன்னை இணைத்துக் கொண்டு மிகப் பெரிய அளவில் வளர்ந்தது. இன்று சீனாவின் மக்கள் தொகையில் அறுபது சதவீதத்திற்கும் மேலானவர்கள் புத்த மதத்தையே பின்பற்றுகிறார்கள்.

இது தவிர மன்னர்கள் காலத்தில் வியாபாரத்திற்காக வந்த இஸ்லாமியர்களும், கிறிஸ்தவர்களும் சீனப் பெண்களை மணம் செய்து கொண்டு சீனாவிலேயே தங்கி விட்டனர். இஸ்லாமியர்கள் மன்னர் ஆட்சியில் மன்னர்களின் நம்பிக்கை பெற்ற போர்ப்படைத் தளபதிகளாக பணி புரிந்தனர். இன்று சீனாவில் நாற்பது மில்லியன் கிறிஸ்தவர்களும், இருபது மில்லியன் இஸ்லாமியர்களும் இருக்கிறார்கள். யூதர்களும், இந்துக்களும் கூட இருக்கிறார்கள்.

மதங்களில் பழமைவாதிகள் இருப்பார்கள். அவர்கள் புதிதாக சிந்திக்க தடையாக இருப்பார்கள் என்கிற நோக்கில் 1949 ல் கம்யூநிசம் தீவிரமாக வளர்ச்சி அடைந்துக் கொண்டிருந்தக் காலக்கட்டத்தில் அனைத்து மதங்களும் சீனாவில் தடைசெய்யப்பட்டன. அதை மீறி மதங்களை பின்பற்றுபவர்கள் கடுமையான தண்டனைக்கு உட்படுத்தப்பட்டார்கள். சிலருக்கு மரணத் தண்டனையும் விதிக்கப்பட்டது. இந்தக் காலக் கட்டத்தில் கோவில்கள் அரசு அலுவலகமாக செயல்பட்டது. இருப்பினும் 1970களுக்குப் பின் யாரும் எந்த மதத்தையும் பின்பற்றிக் கொள்ளலாம் என்று அரசு ஆணை பிறப்பித்து விட்டது. சீனாவில் ஒரு குடும்பம் மொத்தமும் ஒரு மதத்தைப் பின்பற்ற தேவையில்லை. அவரவருக்கு பிடித்த மதத்தை பின்பற்றி கொள்ளலாம். ஒரே குடும்பத்தில் இரண்டு, மூன்று மதங்களை நம்புபவர்கள் இணைந்து வாழ்வதை லூ ஹோவின் குடும்பத்தில் கண்டேன். தாவோயிசம் வழிகாட்டக் கூடிய எளிமையான வாழ்க்கையையும் புத்திசத்தின் பொறுமையையும், சகிப்புத் தன்மையையும் கலந்து பின்பற்றும் வீடாக ஜெர்ரியின் வீடு இருந்தது.

மேலும் சீனர்களிடம் உள்ள ஒரு வழக்கம், அவர்களில் சாதனையாளரான யாரையேனும் பாராட்ட வேண்டுமென்றால் அவர்களது முன்னோர்களுக்கு மரியாதை செய்து பாராட்டுவார்கள். அப்போது தான் இது மாதிரியான பாராட்டு தங்களுக்கும் கிடைக்க வேண்டுமென விரும்பி தங்களுடைய குழந்தைகளை சிறப்பான முறையில் வளர்ப்பார்கள் என்பது ஒரு நம்பிக்கை. இன்றும் கூட நான்கு தலைமுறை முன்னோர்களை வழிபடும் வழக்கம் சீனாவில் இருக்கிறது. நான்கு தலைமுறை முன்னோர்களை வைத்து வழிபடுவது என்பது கன்ஃபூசியனிசத்திலிருந்து வந்த பழக்கம். மதங்கள் பற்றி ஜெர்ரியின் அம்மா ஷங் யாங்யுடன் பேசிக் கொண்டே நாங்கள் சென்ற இடம் கியூ யான் லிங் பார்க். அங்கு மலைமேல் அமைந்துள்ள புத்தக் கோயிலுக்கு சென்று வழிபட்டோம்.

பெரிய, பெரிய ஊதுபத்திகளை கட்டுக் கட்டாக பற்ற வைத்து வழிபாடு செய்கின்றனர். அந்த ஊதுபத்திகளை பற்ற வைப்பதற்கு சில வழிமுறைகள் பின்பற்றப்படுகிறது. நமது ஊரில் கோயில்களில் கருவறையை சுற்றி வந்து வணங்குவது போல ஊதுபத்தியை பற்ற வைத்து சன்னதியைச் சுற்றி வந்து சன்னதியின் முன்னே ஒரு இடத்தில் வைத்து முழந்தாளிட்டு வணங்குகிறார்கள்.நானும் வணங்கினேன். என்ன வேண்டிக் கொண்டீர்கள் என்று ஜெர்ரி என்னிடம் கேட்டான். சந்தித்ததிலிருந்து ஒரு கணமும் அகலாமல் என் கையை பிடித்துக் கொண்டே இருந்த ஜெர்ரி உண்மையிலேயே என் மனதில் பதிந்து விட்டான். இந்த உறவு காலம் முழுவதும் நீடித்திருக்க வேண்டுமென நான் வேண்டிக் கொண்டேன். ஆனால் ஜெர்ரியிடம் எதுவும் சொல்லாமல் மௌனமாய் புன்னகைத்தேன்.

அதற்குப் பின்பு தண்ணீர் நிரம்பிய மிகப்பெரிய தொட்டிக்குள் வைத்திருக்கும் சிறிய மண் குடுவைக்குள் நாணயங்களைப் போட்டு தங்களின் அதிர்ஷ்டத்தை கணக்கிட்டு கொண்டிருந்தவர்களோடு நானும் சேர்ந்து கொண்டேன் என்னுடைய அதிர்ஷ்டத்தைக் கணக்கிட. நானும் சுனில்குமாரும் தண்ணீருக்குள் போட்ட அத்தனை நாணயங்களும் மிகச் சரியாக குடுவைக்குள் விழுந்தன. அதைக் கண்ட மயோ ஆச்சர்யப்பட்டு அவரும் நாணயங்களைப் போட்டார். அத்தனை நாணயங்களும் மிகச் சரியாக குடுவைக்குள் விழுந்தது இந்த முறை மட்டுமே என மகிழ்ந்தார்.

அரசு முறை அழைப்பில் சீனாவிற்கு வந்திருந்தாலும், இங்கே ஒரு குடும்பம் என்கிற உறவு ஏற்பட்டது எங்களுக்கு அதிர்ஷ்டம் தானே என்று நான் மயோவிடம் சொன்னேன். அதற்கு எனக்கும் அப்படியே என்று அவர் கூறினார். தண்ணீருக்குள் மிதந்து செல்லும் விதமான கனமில்லாத நாணயங்கள் இன்று மட்டும் மிகச் சரியாக குடுவைக்குள் விழுந்தது எங்களுக்கும் மகிழ்ச்சி என்று சொன்னார். புத்த கோயிலின் உள்ளே சென்று மிகப் பெரிய புத்தர் சிலையை வணங்கிய பின் வெளியே வந்து சிவப்பு நிறத்தில் அமைக்கப்பட்ட மிகப்பெரிய கதவின் நடுவே உள்ள சிங்க முகத்தை கண்களை மூடிக் கொண்டு சென்று தொட வேண்டும். அவ்வாறு தொட்டால் நாம் நினைத்தது எல்லாம் நடக்கும் என்ற நம்பிக்கையில் பலரும் கண்களை மூடிக் கொண்டு தொட்டனர்.

புதியதாக திருமணமானவர்கள், நண்பர்கள், உறவினர்கள், காதலர்கள் தாங்கள் பிரியக் கூடாது என்று கையைப் பிடித்துக் கொண்டு கண்களை மூடிக்கொண்டு சென்று சிங்க முகத்தைத் தொட்டனர். மத நம்பிக்கைகள் உலகில் எங்கேயும் ஒரே மாதிரித் தான் இருக்கிறது.

பின்பு குவான் இன் என்ற பெண் கடவுளை வழிபட்டோம். அழகு மிளிரும் அந்த சிலை அன்பையும், அமைதியையும் தனக்குள் பொதித்து வைத்திருந்தது. மிகவும் மென்மையான ஒரு உணர்வை அங்கு நான் உணர்ந்தேன். குவான் இன் உலகின் துயரங்களை எல்லாம் தனக்குள் வாங்கிக் கொள்ளும் அமைதியின் தெய்வமாக நம்பப்படுகிறது. சிவப்பு கயிறை குவான் இன் சிலை மற்றும் அருகே உள்ள மரங்களில் வேண்டுதலோடு கட்டி வைக்கின்றனர். உலக அமைதி வேண்டி நானும் கட்டி சிவப்பு கயிறை கட்டினேன். உலகின் எந்த மூலைக்குப் போனாலும் பெண் என்பவள் துயரங்களை தாங்கும் தேவதையாக இருக்கிறாள்.

பயணிப்போம்...

வாசகர்கள் தங்கள் படைப்புகளை editor@thamizhstudio.com என்கிற மின்னஞ்சல் முகவரிக்கு அனுப்பி வைக்கவும்.

படைப்புகள் வேறெந்த வடிவிலும், வேறெந்த ஊடகங்களிலும் வெளிவந்திருக்கக் கூடாது. படைப்புகளை யுனி கோட் வடிவில் அனுப்பவும். அல்லது பயன்படுத்திய எழுத்துருவை தெரிவிக்கவும்.