காளையை கட்டிப்போடும் சக்தி
காளையை கட்டிப்போட முடியவில்லையே என்ற கவலையை சிறிது காலம் தள்ளிப்போட்டுவிட்டு, நாம் வேறு பாதையில் பயணம் செய்வோம். எதற்காக இந்த மாற்றுப்பாதை! என மனதில் சஞ்சலம் கொள்ளத்தேவையில்லை. ஏனெனில் இறுதியில் இந்தப்பாதையும் காளையின் கால்தடங்களை நோக்கித்தான் செல்லும்.
என்ன செய்தாலும், எந்த மாதிரியான வித்தையை பயன்படுத்தினாலும் பங்குச்சந்தையில் நம்மால் பணம் சம்பாதிக்க முடியாது என்கிறபோது, நாம் எதற்காக இது போன்ற விசயங்களை கற்றுக்கொள்ள வேண்டும்?
வெற்றி உறுதி என வீம்பாக இருந்து இழப்பதைவீட, தோல்வியின் தோற்றத்தை புரிந்துகொண்டு பயணத்தை தொடர்வதுதான் புத்திசாலித்தனம். காலையில் தொலைக்காட்சியை பாருங்கள் யாராவது ஒருவர் பங்குச்சந்தை பற்றிய சந்தேகங்களை தொலைபேசியில் தொடர்புகொள்பவர்களுக்கு விளக்கிச்சொல்லிக்கொண்டிருப்பார். தொடர்ந்து அவற்றை கேட்டுக்கொண்டு வாருங்கள். ஒருநாள் சந்தை வீழ்ச்சியடையும் போது ஏன் வீழ்ச்சியடைந்தது, எப்படி வீழ்ச்சியடைந்தது என விளக்கிச் சொல்லிக்கொண்டிருப்பார்களே தவிர இந்த வீழ்ச்சியை அவர்களால் முன்கூட்டியே ஏன் கணிக்கமுடியவில்லை என்பதை பற்றி அவர்களும் பேச மாட்டார்கள் அவர்களை தொடர்புகொள்பவர்களும் கேட்மாட்டார்கள். அவர்களை சொல்லி குற்றமில்லை ஏனெனில் பங்குச்சந்தையை பொருந்தவரையில் ஐரோப்பாவில் இடி இடித்தால் இந்தியாவில் மழை பெய்யும். எனவே வீழ்ச்சிக்கான காரணங்களை கணக்கிட முடியாது.
மரணம் உறுதி என தெரிந்த பின்பும் நாம் மகிழ்ச்சியாக வாழ்வதுபோல, பங்குச்சந்தை என்றால் வீழ்ச்சி என்பது உறுதி என்ற சிந்தனையையும் நாம் வளர்த்துக்கொள்ள வேண்டும். அந்த வீழ்ச்சியில் நாம் சிக்கிக்கொள்ளாமல் பயணம் செய்வது எப்படி என்ற விதத்திலேயே நம் கவணம் செல்ல வேண்டும்.
சாதிக்க தேவைப்படும் சக்தி:
பங்குச்சந்தையில் உங்களால் எவ்வளவு காலத்திற்கு தாக்குப்பிடிக்க முடியும்? அதற்கு ஒரு அளவுகோல் உள்ளது “எவ்வளவு அடியை நீங்கள் தாங்குவீர்கள்!” என்பதே அந்த அளவுகோல். இந்த அளவுகோல் ஒவ்வொரு மனிதரிடமும் மாறுபட்டு இருக்கும். ஒருவர் ஒரு லட்சம் ரூபாய் முதலீடு செய்திருக்கலாம், மற்றொருவர் பத்தாயிரம் ரூபாய் முதலீடு செய்திருக்கலாம், சந்தை வீழ்ச்சியடையும் போது பத்தாயிரம் ரூபாய் முதலீடு செய்தவரின் கதை ஓர் நாள் அல்லது இரண்டு நாட்களில் முடிந்துவிடும். ஆனால் ஒரு லட்சம் ரூபாய் முதலீடு செய்தவர் தொடர்ந்து சில நாட்களுக்கு தாக்குபிடிக்க முடியும். இதுதான் அவர்கள் அடியை தாங்கும் அளவு. அதற்கு மேல் அவர்களால் தாக்குப்பிடிக்க இயலாது.
இந்த தாக்குப்பிடிக்கும் திறனை, ஒருவரின் வாங்கும் சக்தி என குறிப்பிடலாம். ஒருவர் பங்குச்சந்தை வணிகத்திற்காக எவ்வளவு தொகையை வைத்துள்ளார்? அவரால் உச்சகட்டமாக எவ்வளவு ரூபாய்க்கு பங்குகளை வாங்க முடியும்? என்பது அந்த நபரின் வாங்கும் சக்தியின் அளவைக்குறிக்கும்.
உதாரணமாக நீங்கள் பங்கு வர்த்தகத்திற்காக பத்தாயிரம் ரூபாய் வைத்திருக்கின்றீர்கள் என்றால் உங்களுடைய வாங்கும் சக்தியின் அளவு பத்தாயிரம் தான். ஒரு நல்ல வாய்ப்பை கண்டதும் நீங்கள் உங்களிடமுள்ள மொத்த பணத்திற்கும் பங்குகளை வாங்கிவிட்டால் உங்களுடைய வாங்கும் சக்தி தீர்ந்துவிட்டது என்று அர்த்தம்.
இந்த வாங்கும் சக்தியானது ஒவ்வொரு மனிதரிடமும் வேறுபட்டு இருக்கும். ஆனால் இவற்றை பொதுவாக நடுத்தர மக்களின் வாங்கும் சக்தி மற்றும் மேல்தட்டு மக்களில் வாங்கும் சக்தி என இரண்டுவிதமாக பிரித்துக்கொள்ளலாம். ஏனெனில் சந்தை வீழ்ச்சி என்றாலே அதில் அடிபட்டு முதலில் அழத்தொடங்குவது நடுத்தர மக்கள்தான், மேல்தட்டு மக்களுக்கும் அந்த முதலீட்டை பொருத்த வரையில் அப்போதைக்கு அது இழப்புதான் என்றாலும் பெரிய அடியாக அது அமையாது. அதனால்தான் இதுபோன்ற பிரிவினை. இந்த பிரிவினை நமக்கு மிகவும் அவசியமானது. அந்த அவசியத்தை நீங்கள் அடுத்தடுத்து படிக்கும் போது தெரிந்துகொள்வீர்கள்.
ஒரு விசயத்தை கவணித்தீர்களானால் உங்களுக்கொரு உண்மை புரியும் மேல்தட்டு மக்களை பொருத்தவரையில் தங்களிடமுள்ள மொத்த தொகையையும் முதலீடு செய்யாமலேயே நல்ல இலாபம் பெருகிறார்கள். ஆனால் நடுத்தர மக்களை பொருத்தவரையில் தங்களிடமுள்ள ஒட்டுமொத்த தொகையை முதலீடு செய்தாலும்கூட பெரிய அளவில் பிரச்சனைகளையும், சிறிய அளவில் இலாபத்தையும் சந்திக்கின்றார்கள். ஏனெனில் மேல்தட்டு மக்களிடம் வாங்கும் சக்தியானது மிக அதிகமாக இருக்கிறது. நடுத்தர மக்களிடம் வாங்கும் சக்தியானது மிக குறைவாக இருக்கிறது.
நடுத்தர மக்கள் தங்களிடமுள்ள பணத்தைக்கொண்டு ஒருமுறை அல்லது இருமுறை மட்டுமே பங்குகளை வாங்க இயலும். வாங்கிய பங்குகள் எதிர்பார்ப்புக்கு மாறாக எதிர் திசையில் பயணித்தால், பொறுமையாக காத்திருப்பதை தவிர வேறு எதுவும் அவர்களால் செய்ய இயலாது. அதற்கு மேல் அவர்கள் செயல்பட விரும்பினால் இருக்கும் ஒரே வழி கடன் வாங்குவதுதான், அதற்கு பேசாமல் கையை கட்டிக்கொண்டு பேசாமல் இருக்கலாம். இவ்வளவுதான் நடுத்தர மக்களின் வாங்கும் சக்தி.
இருப்பதோ குறைவான தொகை, கடன் வாங்க கூடாது, ஆனால் தங்களிடமுள்ள குறைந்த அளவு வாங்கும் சக்தியைக்கொண்டு மேல்தட்டு மக்களைப்போல் பிரச்சனைகள் இல்லாமல் அதிக அளவில் இலாபம் சம்பாதிப்பது எப்படி?
இதுதான் கேள்வி – இந்த கேள்விக்கான விடையைத்தான் இனி இங்கே தேடப்போகிறோம். எனவே காளையையும் அதற்கான கயிற்றையும் சிறிது காலத்திற்கு மறந்திருங்கள்.
தொடரும்...
|
